رئيس التحرير
اسلام شريدح
رئيس مجلس الاداره
اشرف نور
لو كنت حر..!!
20-03-2016 16:10:46
لو كنت حر..!!
Bookmark and Share
شعر د / عادل فهمي

 

لو كنت حر بدون قيود

سابح مع النور في الوجود

والروح طليقة بدون حدود

عاوز جناح أبيض طويل

يعبر حدود المستحيل

يقطع خيوط العنكبوت

و يفر من سجن السكوت

يضحك لزهرة مفتحة

وحمامة شاردة مروّحة

و رضيع بإسم ما يعرفوش

جايبين له وش ما يشبهوش

وقالو له عيش وسط الوحوش

والطفل ظبي عيونه سود

خايف يروح عند الأسود

و لأنه محتاج للحنان..

والخوف جبان..وما لوش أمان

فكر يتوه بين البشر

و يخلي قلبه من حجر

يرقص لحبات المطر

يحزن لأنات الوتر

ويحط اسمه على الأفيش

***

الطفل محتاج الاختيار

الحب نار..والصمت عار

والطفل عايش الانتظار

مستنى لحظة الانتصار

ولأنه كان من دون خيار

ركب القطار..

***

الدنيا رايحة وهو جايّ

الدنيا عتمة وهو ضيّ

وبروح جريئة وقلب حيّ

قرر يطير ..عند القمر

ويعيش حياته مع السفر

لكن وهو بينطلق

قلبه انكسر

وفي ليل طويل

ماشي يدور ع الدليل

على ضيّ روحه اللي اختفى

ف طريق طويل

عايش يدور ع الدليلْ

*** 

لو كنت حر .. بدون قيود

وقدرت أصدق في الوعود

هكتب رواية عمر ضاع

كان كل أحلامه" شعاع"

يعبر جدار المصيدة

و يفك عقدة معقّدة

 

اضف تعليق
الأسم
الإيميل
النص
تعليقات القراء
كوميديا المحارم
حمل العدد الإسبوعي